PMII Purwakarta Desek Kejari Nalungtik Yayasan Anu Diduga Aya Patalina Jeung Skandal BGN Nasional
PMII Purwakarta Desek Kejari Nalungtik Yayasan Anu Diduga Aya Patalina Jeung Skandal BGN Nasional
Purwakarta – Warta Sunda Online,-
Pengurus Cabang Pergerakan Mahasiswa Islam Indonesia (PC PMII) Purwakarta ngayakeun aksi nepikeun aspirasi di hareupeun Kantor Kejaksaan Negeri Purwakarta, Kemis (18/6/2026). Dina éta aksi, PMII ngadesek Kejaksaan Negeri Purwakarta sangkan ngalaksanakeun panalungtikan kana yayasan-yayasan anu diduga aya patalina jeung skandal BGN anu keur jadi sorotan di tingkat nasional.
Ketua PC PMII Purwakarta, Irfan Aldi Wiguna, nétélakeun yén kadatangan maranéhna ka Kantor Kejaksaan téh minangka wawakil masarakat pikeun nepikeun tuntutan sangkan aparat penegak hukum nalungtik sacara tuntas yayasan-yayasan anu diduga boga hubungan jeung perkara éta.
"Kami ngadesek Kejaksaan Negeri Purwakarta sangkan nalungtik yayasan-yayasan BGN anu diduga aya patalina jeung skandal BGN nasional. Masarakat miboga hak pikeun meunang kajelasan jeung kapastian hukum," pokna ka wartawan.
Irfan ogé ngaku hanjakal lantaran Kepala Kejaksaan Negeri Purwakarta teu tiasa patepang langsung jeung massa aksi. Numutkeun anjeunna, PMII miharep bisa nepikeun aspirasi sacara langsung ka pimpinan lembaga éta.
"Kami rada hanjakal lantaran Ibu Kajari teu tiasa narima kami anu datang minangka representasi masarakat. Kami meunang katerangan yén anjeunna keur ngalaksanakeun agenda séjén. Sanajan kitu, kami nganggap ngadangukeun aspirasi masarakat ogé mangrupa hal anu penting," saur Irfan.
Sanajan kitu, PMII tetep ngahargaan kana agenda anu keur dilaksanakeun ku Kejaksaan Negeri Purwakarta. Maranéhna ngaharepkeun sakabéh tuntutan anu geus ditepikeun bisa ditindaklanjuti sacara profesional luyu jeung aturan hukum anu berlaku.
Irfan negeskeun yén PMII Purwakarta bakal terus ngawal ieu perkara nepi ka aya kajelasan ti pihak anu boga kawenangan. Malah, lamun can aya tanggapan anu nyugemakeun, maranéhna ngarencanakeun ngayakeun aksi salajengna kalayan jumlah massa anu leuwih loba.
"Kami bakal terus ngawal ieu masalah. Ka hareupna kami siap ngayakeun deui aksi kalayan massa anu leuwih loba lamun can aya léngkah nyata tina pihak anu boga kawenangan," tegesna.
Aksi lumangsung kalayan tertib dina pangawasan aparat kaamanan. PMII ngaharepkeun yén léngkah anu dilakukeun ku maranéhna bisa jadi pangdorong pikeun aparat penegak hukum sangkan nalungtik sagala dugaan anu berkembang di masarakat sacara obyéktif, transparan, jeung akuntabel.***
0 Response to "PMII Purwakarta Desek Kejari Nalungtik Yayasan Anu Diduga Aya Patalina Jeung Skandal BGN Nasional"
Posting Komentar