Pawai Obor di Pasar Jumat Aya Musibah, Saurang Ketua RT Nalika Atraksi Debus, Kalentab Seuneu
Pawai Obor di Pasar Jumat Aya Musibah, Saurang Ketua RT Nalika Atraksi Debus, Kalentab Seuneu
Purwakarta – Warta Sunda Online,-
Kagiatan pawai obor di wewengkon Pasar Jumat diwarnaan ku kajadian anu teu disangka-sangka. Saurang pamilon anu dipikanyaho minangka Ketua RT 40/07 Nagri Tengah ngalaman tatu kaduruk dina bagian beungeut sanggeus mintonkeun atraksi siga debus ku ngalalap seuneu. Senen peuting, 15/6/2026 Pasar Jumat Purwakarta.
Numutkeun katerangan ti warga di sabudeureun tempat kajadian, atraksi éta mimitina dimaksudkeun pikeun ngahibur masarakat anu nyaksian pawai obor. Tapi hanjakalna, seuneu anu dilalap malah nyamber kana beungeut korban nepi ka ngabalukarkeun tatu kaduruk.
Kajadian éta ngajadikeun suasana di lokasi sakedapan jadi riweuh. Warga jeung pamilon séjén buru-buru mantuan korban sarta masihan pitulung saméméh dibawa pikeun meunangkeun pananganan médis.
Dugi ka ayeuna, can aya katerangan resmi ngeunaan kaayaan panganyarna korban. Dugi ka warta ieu diturunkeun, ngaran Ketua RT 40/07 anu jadi korban kajadian éta tacan dipikanyaho, sarta can aya katerangan resmi ti pihak-pihak nu patali.
Kajadian ieu dipiharep jadi pangéling-ngéling sangkan dina unggal kagiatan masarakat salawasna ngautamakeun kasalametan jeung nyingkahan atraksi anu ngabahayakeun pikeun nyegah kajadian sarupa kajadian deui.***
0 Response to "Pawai Obor di Pasar Jumat Aya Musibah, Saurang Ketua RT Nalika Atraksi Debus, Kalentab Seuneu"
Posting Komentar