Misteri Tilardunyana Pemuda di Pasawahan Purwakarta, Kapanggih dina Tukangeun Sirah Soek!
Misteri Tilardunyana Pemuda di Pasawahan Purwakarta, Kapanggih dina Tukangeun Sirah Soek!
PURWAKARTA - Warta Sunda Online,- Warga Kampung Pandai, Désa Sawah Kulon, Kacamatan Pasawahan, Kabupaten Purwakarta, kagét ku kapanggihna jasad hiji pemuda anu can dipikanyaho idéntitasna di sisi jalan, dina Saptu (27/6/2026) isuk.
Korban kapanggih dina kaayaan matak prihatin. Suku korban nyangsang dina sasak leutik nuju ka imah warga, sedengkeun sirahna ngagantung ka arah solokan. Kajadian éta langsung narik perhatian warga sabudeureun anu tuluy ngalaporkeun ka aparat kapulisian.
Anggota Satreskrim Polres Purwakarta babarengan jeung Tim INAFIS langsung sumping ka lokasi pikeun masang garis pulisi, ngalaksanakeun olah tempat kajadian perkara (TKP), sarta ngaidentifikasi jasad korban.
Dumasar kana hasil pamariksaan awal, idéntitas korban can acan kanyahoan lantaran teu kapanggih kartu idéntitas atawa dokumén séjén. Pulisi manggihan sababaraha tatu lecet dina leungeun, suku, jeung sababaraha bagian awak korban. Salian ti éta, aya tatu soek nu manjang dina bagian tukangeun sirah anu ayeuna keur dijadikeun bahan panalungtikan.
"Kami nampi laporan ti anggota Karang Taruna Désa Sawah Kulon ngeunaan kapanggihna hiji jasad. Sanggeus dipariksa ka lokasi, éta laporan téh leres, tuluy ku kami dilaporkeun ka Polsek Pasawahan. Tétéla saméméhna ogé geus aya warga anu ngalaporkeun éta kajadian," saur Kasi Trantib Kacamatan Pasawahan, Hendra, di lokasi kajadian.
Dugi ka ieu bérita ditulis, jasad korban geus dievakuasi ka rumah sakit pikeun dipariksa leuwih jero. Pulisi masih kénéh ngalaksanakeun panalungtikan pikeun ngungkab idéntitas korban jeung mastikeun panyabab pupusna, kaasup nalungtik aya henteu unsur kajahatan dina éta kajadian.
Masarakat anu ngarasa kaleungitan anggota kulawarga kalayan ciri-ciri nu saluyu jeung korban dipénta sangkan geuwat ngahubungi Polres Purwakarta atawa Polsek Pasawahan pikeun ngabantu prosés idéntifikasi.***
0 Response to "Misteri Tilardunyana Pemuda di Pasawahan Purwakarta, Kapanggih dina Tukangeun Sirah Soek!"
Posting Komentar