PERSIB SUMANGET NYANGHAREUPAN HASIL UNDIAN ACC 2026/2027

PERSIB SUMANGET NYANGHAREUPAN HASIL UNDIAN ACC 2026/2027

Bandung – Warta Sunda Online,- 

Persib Bandung ngabagéakeun kalayan sumanget hasil undian ASEAN Club Championships (ACC) 2026/2027 anu nempatkeun Maung Bandung di Grup B. Acara undian dilaksanakeun di Jakarta, Jumaah (5/6/2026).

Dina Grup B, PERSIB bakal papaséa jeung sababaraha klub kuat ti Asia Tenggara, nyaéta Port FC (Thailand), Johor Darul Ta'zim FC (Malaysia), Lion City Sailors FC (Singapura), Cong An Ha Noi FC (Vietnam), sarta Preah Khan Reach Svay Rieng FC (Kamboja). Salian ti éta, aya ogé juara pertandingan play-off antara Ezra FC ti Laos jeung Shan United FC ti Myanmar.

Wakil CEO PT Persib Bandung Bermartabat, Adhitia Putra Herawan, nétélakeun yén grup anu dieusi ku tim-tim jawara nagarana masing-masing bakal jadi tantangan anu hadé pikeun PERSIB.

“Turnamén ieu bakal pikaresepeun pisan. Ampir sakabéh tim di Grup B mangrupakeun jawara di nagarana. Pikeun PERSIB, ieu jadi ujian anu penting saméméh nyanghareupan kompetisi Asia AFC,” pokna.

Salah sahiji hal anu matak narik perhatian nyaéta patepungna deui PERSIB jeung dua lawan anu geus remen dipanggihan dina kompetisi régional, nyaéta Lion City Sailors jeung Port FC.

Numutkeun Adhitia, sanajan geus kungsi papaséa dina musim-musim saméméhna, kaayaan ayeuna tangtu bakal béda sabab unggal tim terus ngalakukeun pembenahan sarta nguatkeun skuadna.

“Hampura, siga geus jodo jeung Lion City, unggal taun sok patepung. Tapi unggal musim pasti aya parobahan. Hasil-hasil saméméhna teu bisa dijadikeun ukuran pikeun pertandingan ayeuna,” saur anjeunna.

Kalawan hasil undian ieu, PERSIB dipiharep bisa némbongkeun kamampuh pangalusna sarta ngawakilan Indonesia kalayan hadé dina ajang ACC 2026/2027.***

Sumber: Persib.co.id

REDAKTUR : Tim Redaksi

Sudah saatnya bangkit dari keterpurukan...

Subscribe to receive free email updates: