Bupati Saepul Bahri Binzen Apresiasi Pangabdian Norman Nugraha
Bupati Saepul Bahri Binzen Apresiasi Pangabdian Norman Nugraha
PURWAKARTA – Bupati Purwakarta, Saepul Bahri Binzen, ngiluan acara Serah Terima Jabatan (Sertijab) Sekretaris Daerah (Sekda) Kabupaten Purwakarta nu dipidangkeun di Pendopo Pemkab Purwakarta, Kemis sonten (25/9/2025).
Ieu acara nandaan peralihan tugas ti Sekda heubeul, Norman Nugraha, anu ayeuna dipercaya janten Kepala BPKAD Provinsi Jawa Barat, ka Pelaksana Harian (Plh.) Sekda, Nina Herlina. Prosesi Sertijab dipungkas ku penandatanganan berita acara ku duanana pejabat sarta disaksian langsung ku Bupati Purwakarta.
Dina sambutanana, Norman Nugraha ngedalkeun rasa nuhun ka sakumna jajaran Pamaréntah Kabupaten Purwakarta anu parantos masihan dukungan salila anjeunna ngajabat, sarta henteu mopohokeun nyuhunkeun hapunten upami aya kakirangan dina ngalaksanakeun tugas.
Sedengkeun, Bupati Saepul Bahri Binzen (Om Zein) ngedalkeun apresiasi anu jero pikeun dedikasi Norman Nugraha, anu dinilaina geus nyumbangkeun tanaga, pamikiran, waktos, jeung haténa pikeun kamajuan Purwakarta.
> “Tangtos ieu mangrupakeun hiji tugas jeung amanah anu kedah dilaksanakeun kalayan sae tur pinuh rasa tanggung jawab. Loba pisan target-target ka hareup anu kedah direngsekeun di tempat anyar,” saur Bupati.
Bupati ngaharepkeun, pangabdian Norman Nugraha tiasa janten inspirasi pikeun sakumna jajaran Pemkab Purwakarta sangkan terus ningkatkeun kinerja jeung profesionalisme demi kamajuan daerah.
Acara Sertijab ieu dihadiran ku Wakil Bupati, Staf Ahli Bupati, Asisten Daerah, Kapala Perangkat Daerah, sarta para Camat sa-Kabupaten Purwakarta.
(Diskominfo Purwakarta)
0 Response to "Bupati Saepul Bahri Binzen Apresiasi Pangabdian Norman Nugraha"
Posting Komentar