Peringatan Hari Museum Nasional 2025 Kemenbud: Museum Kudu Jadi Tempat Hirupkeun Budaya, Henteu Ngan Etalase Barang Baheula
Peringatan Hari Museum Nasional 2025
Kemenbud: Museum Kudu Jadi Tempat Hirupkeun Budaya, Henteu Ngan Etalase Barang Baheula
JAKARTA - WSO,- Kamentrian Kabudayaan ngayakeun Peringatan Hari Museum Nasional 2025 di Gedung Plaza Insan Berprestasi, Komplek Kemenbud, Jakarta. Acara anu ngusung téma “Museum Berkelanjutan, Budaya Bermartabat” ieu dimaksudkeun pikeun nguatkeun posisi museum minangka lembaga anu adaptif, edukatif, sarta nyambungkeun nilai-nilai budaya antargenerasi.
Menteri Kabudayaan (Menbud) Fadli Zon nyebut yén museum lain ngan saukur tempat nyimpen barang kuno, tapi kudu jadi garda pangdepan dina ngariksa warisan budaya bangsa.
“Museum téh kudu boga jiwa, kudu hirup. Henteu ngan pikeun neundeun artefak, tapi ogé pikeun ngadidik, ngainspirasi, jeung ngalestarikeun budaya bangsa,” saur Fadli Zon dina pidatonana, Ahad (12/10/2025).
RUU Permuseuman Jadi Léngkah Strategis
Dina kasempetan éta, Kemenbud ogé ngumumkeun yén pihakna keur ngarancang Rancangan Undang-Undang (RUU) Permuseuman, pikeun nguatkeun payung hukum, ningkatkeun tata kelola, jeung ngadorong kolaborasi antar lembaga budaya.
Salah sahiji léngkah awal nyaéta nyusun Registrasi Nasional Museum, pikeun ngadaptarkeun sakabéh museum di Indonesia sangkan tata kelolaanana leuwih transparan jeung profesional.
Kemenbud ogé nyerahkeun Sertipikat Pendaftaran Museum ka dalapan museum ti sababaraha daerah, di antarana:
1. Museum Prabu Siliwangi (Jawa Barat)
2. Museum Pidie Jaya (Aceh)
3. Museum POLRI (Jakarta)
4. Museum Negeri Kalimantan Barat
5. Museum Rudana (Bali)
6. Museum Neka (Bali)
7. Museum Tari jeung Musik Nusantara (Banten)
8. Museum Daerah Banggai Laut (Sulawesi Tengah)
“Kami miharep museum-museum ieu bisa jadi conto pikeun lembaga budaya séjén, sangkan leuwih aktif, transparan, jeung mibanda nilai edukatif pikeun masyarakat,” pok Fadli Zon.***
0 Response to "Peringatan Hari Museum Nasional 2025 Kemenbud: Museum Kudu Jadi Tempat Hirupkeun Budaya, Henteu Ngan Etalase Barang Baheula"
Posting Komentar