Dua Besti Siswi SDN Cijaya Campaka Siap Tarung di Kota Bogor dina Ajang FTBI Tingkat Provinsi Jawa Barat
Dua Besti Siswi SDN Cijaya Campaka Siap Tarung di Kota Bogor dina Ajang FTBI Tingkat Provinsi Jawa Barat
PURWAKARTA, Warta Sunda Online – Prestasi anu matak ngabanggakeun deui diraih ku dunya pendidikan Kabupaten Purwakarta. Dua urang siswi SD Negeri Cijaya, Kecamatan Campaka, hasil ngukir préstasi kalayan ngaréngsékeun pasanggiri sarta meunang Juara 1 dina Festival Tunas Bahasa Ibu (FTBI) tingkat Kabupaten Purwakarta Taun 2026.
Ayeuna, duanana geus dipasihan kapercayaan pikeun jadi wawakil Kabupaten Purwakarta dina ajang FTBI tingkat Provinsi Jawa Barat anu baris dilaksanakeun di Kota Bogor.
Dua siswi anu pinunjul kasebut nyaéta Disha Khaira Wilda, anu hasil ngaréngsékeun Juara 1 dina cabang Ngadongéng, sarta Naiyya Assyfatu Haifa, anu hasil jadi Juara 1 dina cabang Biantara.
Ieu préstasi tangtu jadi kabagjaan jeung kabanggaan pikeun kulawarga gedé SDN Cijaya. Salian ti ngangkat ngaran sakola, duanana ogé miboga pancén pikeun mawa ngaran hadé Kabupaten Purwakarta di tingkat provinsi.
Anu matak narik ati, sanajan duanana sarua diuk di kelas VI, tapi miboga karakter jeung kapribadian anu béda. Sanajan kitu, bédana karakter téh lain jadi halangan pikeun ngamekarkeun poténsi jeung bakat séwang-séwangan.
Disha Khaira Wilda, Percaya Diri Ngamumulé Seni Ngadongéng Sunda
Disha Khaira Wilda, anu biasa disaur Neng Endis, mangrupa siswi kalahiran Purwakarta, 26 Oktober 2014. Manéhna hasil jadi Juara 1 cabang Ngadongéng sanggeus ngaliwatan prosés latihan jeung sababaraha pangalaman milu pasanggiri ti mimiti kelas III.
Nalika kelas III, Endis kungsi milu pasanggiri tingkat kabupaten sarta meunang Juara 2. Prestasina terus ningkat nepi ka kelas IV, V, jeung VI, nepi ka hasil meunang Juara 1 tingkat Kabupaten Purwakarta.
Minatna kana seni ngadongéng Sunda mimiti tumuwuh sanggeus mindeng lalajo rupa-rupa pidangan dina YouTube sarta ningali pintonan para juru dongéng. Salah sahiji tokoh anu jadi inspirasi pikeun dirina nyaéta Endang Fatmawati, S.Pd., guru sakaligus pembimbingna di sakola.
Dina pintonan ngadongéng, Endis kudu mampuh nepikeun carita ku basa Sunda anu merenah tur matak pikaresepeun, dibarengan ku éksprési raray jeung gerak awak anu luyu jeung galur carita. Lilana pintonan kurang leuwih lima nepi ka tujuh menit.
Endis ngaku ngarasa bungah meunang pangalaman anyar ngaliwatan ajang FTBI. Dina nyanghareupan pasanggiri tingkat provinsi, manéhna boga harepan bisa asup genep gedé, malah miharep bisa ngahontal tilu gedé.
Manéhna ogé sadar yén pasanggiri di tingkat provinsi tangtu bakal leuwih ketat, sabab aya sababaraha daérah anu miboga pamilon kalayan kamampuh ngadongéng anu hadé.
Salian ti resep ngadongéng, Endis ogé boga karesep kana seni tari atawa ngedance. Cita-citana hayang jadi anggota tentara lantaran kataji ku dunya kamiliteran.
Pangrojong ti kolotna, Ida Nurlaela jeung Irwan Iswandi, jadi sumanget tambahan pikeun Endis sangkan terus diajar, latihan, jeung mekarkeun bakatna.
Naiyya Assyfatu Haifa, Siswi Nu Cicingeun tapi Miboga Préstasi dina Biantara
Samentara éta, préstasi anu matak ngabanggakeun ogé diraih ku Naiyya Assyfatu Haifa, siswi SDN Cijaya anu hasil jadi Juara 1 cabang Biantara dina FTBI tingkat Kabupaten Purwakarta Taun 2026.
Naiyya lahir di Purwakarta tanggal 30 Juli 2014. Bédana jeung Endis anu leuwih ékspresif, Naiyya mah dipikawanoh minangka budak anu rada éra jeung leuwih resep cicingeun.
Sanajan kitu, sipatna anu rada éra henteu jadi halangan pikeun némbongkeun kamampuh nyarita di hareupeun balaréa ngaliwatan cabang Biantara.
Lalampahan Naiyya dina dunya pasanggiri ogé pinuh ku pangalaman. Manéhna kungsi milu pasanggiri tingkat kacamatan sarta meunang Juara 1. Nalika kelas V, manéhna ogé kungsi milu pasanggiri tingkat kabupaten, sanajan harita can hasil meunangkeun kajuaraan.
Pangalaman éta jadi bekel anu kacida berhargana, nepi ka ahirna nalika kelas VI, Naiyya mampuh ngabuktikeun kamampuhna ku meunang Juara 1 cabang Biantara FTBI Kabupaten Purwakarta 2026.
Salian ti Biantara, Naiyya ogé miboga pangalaman dina widang kasenian, saperti pupuh jeung solo. Manéhna ogé dipikawanoh miboga kamampuh ngagambar jeung nyaritakeun hiji hal.
Putri ti pasangan Eti Nurbaeti jeung Yusmara Aries ieu miboga cita-cita hayang jadi dokter barudak. Salaku anak tunggal, préstasi anu diraihna tangtu jadi kabagjaan jeung kabanggaan pikeun kulawargana.
Anu matak narik ati, sanajan Endis jeung Naiyya aya dina kelas anu sarua, tapi duanana miboga karakter anu béda. Duanana ogé silih méré sumanget sarta silih saingan sacara positif dina kagiatan diajar di kelas.
Endang Fatmawati, Sosok Guru Pembimbing anu Deukeut jeung Murid
Di balik kasuksésan dua siswi kasebut, tangtu aya peran penting ti guru pembimbingna, nyaéta Endang Fatmawati, S.Pd.
Salaku guru anu miboga karesep jeung bakat dina widang kasenian, Bu Endang salawasna usaha pikeun ngaguar poténsi unggal murid ngaliwatan pendekatan anu disaluyukeun jeung karakter masing-masing budak.
Dina ngabimbing Endis, Bu Endang ngalatih sangkan leuwih wani, percaya diri, sarta mampuh nepikeun carita kalayan hadé ngaliwatan latihan jeung kabiasaan.
Sedengkeun pikeun Naiyya, pendekatan anu leuleuy jeung persuasif jadi salah sahiji cara pikeun ngawangun rasa nyaman, sangkan siswi anu tadina rada éra téh bisa leuwih percaya diri nalika tampil.
Pikeun dua siswi kasebut, Bu Endang lain saukur guru pembimbing, tapi ogé jadi sosok babaturan pikeun silih bagi carita. Suasana latihan anu santai, teu tegang, jeung pinuh ku kaakraban ngajadikeun prosés ngabina bakat karasa leuwih pikaresepeun.
Pendekatan saperti kitu jadi bagian penting dina mekarkeun kamampuh téknis, sakaligus ngawangun méntal jeung kawani murid pikeun tampil di hareupeun balaréa.
Kapala SDN Cijaya Ngaraos Reueus, Nyuhunkeun Doa jeung Pangrojong
Samentara éta, Kapala SD Negeri Cijaya, Kecamatan Campaka, Kabupaten Purwakarta, H. Cece Sumarna, S.Pd., ngedalkeun rasa reueus jeung bungah ka Warta Sunda Online, Salasa, 17/11/2026, malah mandar kana préstasi dua anak didikna anu hasil jadi juara kahiji tingkat kabupaten sarta dipercaya jadi wawakil Kabupaten Purwakarta di tingkat Provinsi Jawa Barat.
Numutkeun anjeunna, ieu kahontalna préstasi téh mangrupa kabagjaan pikeun pihak sakola, sakaligus jadi motivasi pikeun murid séjénna sangkan terus ngaguar jeung mekarkeun bakat katut kamampuhna.
Pihak sakola miharep Disha Khaira Wilda jeung Naiyya Assyfatu Haifa bisa nyiapkeun diri kalayan hadé, ngajaga sumanget, sarta mintonkeun kamampuh anu panghadéna nalika pasanggiri di Kota Bogor.
"Kami ngarasa reueus anak didik SDN Cijaya bisa jadi wawakil Kabupaten Purwakarta di tingkat Provinsi Jawa Barat. Kami nyuhunkeun doa jeung pangrojong moril ti sadaya pihak, sangkan duanana dipaparin kalancaran sarta bisa jadi juara," saur H. Cece Sumarna.
Ngajaga Ngaran Hadé Purwakarta, Ngamumulé Basa jeung Budaya Sunda
Kasuksésan Disha Khaira Wilda jeung Naiyya Assyfatu Haifa jadi bukti yén poténsi murid bisa mekar ngaliwatan pangaping anu merenah, pangrojong kulawarga, sarta lingkungan sakola anu méré rohangan pikeun kréativitas barudak.
Ayeuna, duanana baris nyanghareupan tangtangan anyar dina ajang FTBI tingkat Provinsi Jawa Barat di Kota Bogor.
Kalayan bekel pangalaman, latihan, sarta pangrojong ti kolot jeung pihak sakola, dua siswi SDN Cijaya kasebut dipiharep bisa mintonkeun kamampuh anu panghadéna sarta ngahontal préstasi pikeun ngaharumkeun ngaran Kabupaten Purwakarta.
Préstasi duanana ogé méré palajaran yén bédana karakter lain halangan pikeun ngahontal kasuksésan. Endis némbongkeun kamampuhna ngaliwatan seni ngadongéng, ari Naiyya ngabuktikeun kawani jeung kamampuhna ngaliwatan Biantara.
Dua siswi, dua karakter, jeung dua cabang pasanggiri anu béda, tapi miboga tujuan anu sarua: mawa ngaran hadé Kabupaten Purwakarta bari milu ngajaga sangkan basa jeung budaya Sunda tetep hirup di tengah-tengah generasi ngora.


Komentar