Tantan Sulthon Diistrenan Jadi Ketua PWI Jabar Periode 2026–2031

Tantan Sulthon Diistrenan Jadi Ketua PWI Jabar Periode 2026–2031

BANDUNG – Warta Sunda Online,-

Kapengurusan Persatuan Wartawan Indonesia (PWI) Provinsi Jawa Barat période 2026–2031 resmi dilantik di Gedung Merdeka, Kota Bandung, Juma'ah, 2 Oktober 2026.

Tantan Sulton Bukhawan atawa anu leuwih dipikawanoh ku sebutan Tantan Sulthon, resmi mingpin PWI Jawa Barat pikeun période lima taun ka hareup.

Tantan saméméhna kapilih jadi Ketua PWI Jabar dina Konferensi Provinsi (Konferprov) PWI Jabar anu dilaksanakeun di Kota Bandung, 12 Agustus 2026. Dina prosés pamilihan éta, Tantan meunang 444 sora, sedengkeun kandidat séjénna, Hardiansyah, meunang 247 sora. Tina 699 sora anu asup, aya dua sora abstain jeung genep sora henteu sah.

Sanggeus kapilih, Tantan ngajak sakumna anggota PWI, boh di tingkat provinsi boh kabupatén/kota, pikeun ngawangun organisasi sacara babarengan. Numutkeun manéhna, program organisasi moal bisa dilaksanakeun sacara maksimal tanpa aya persatuan jeung kabersamaan.

Dina kapamingpinan anyar, PWI Jabar boga jaringan anu ngawengku 22 kota/kabupatén, opat Pokja, sarta leuwih ti 1.000 anggota. Struktur organisasi éta dipiharep bisa terus ditata jeung dikuatkeun, bari ngalaksanakeun fungsi kewartawanan nepi ka tingkat masarakat.

Tantan ogé nekenkeun pentingna peran PWI dina ngawal pangwangunan Jawa Barat. PWI Jabar bakal terus ngawal agenda Jabar Istimewa, bari mastikeun informasi ngeunaan rupa-rupa program jeung kawijakan bisa ditepikeun ka masarakat sacara jelas.

Salian ti éta, anggota PWI Jabar dipiharep bisa jadi bagian tina kakuatan informasi anu bisa dimangpaatkeun ku pamaréntah daérah. Komunikasi antara wartawan jeung pamaréntah kudu terus diwangun sangkan rupa-rupa keluh-kesah masarakat bisa ditepikeun sarta meunang perhatian.

“Kota ditata, lembur diurus,” jadi salah sahiji perhatian dina nguatkeun peran pers pikeun nyalurkeun informasi ngeunaan kaayaan masarakat. Dina kontéks éta, PWI Jabar boga peran pikeun ngagandengkeun wartawan jeung sakumna pihak dina nyanghareupan rupa-rupa persoalan di lapangan.

Kapengurusan anyar ogé nyanghareupan parobahan média digital jeung perkembangan téknologi, kaasup kecerdasan jieunan (AI). Ku kituna, kompeténsi jeung profesionalisme wartawan jadi bagian penting dina nguatkeun kualitas jurnalistik di Jawa Barat.

Pelantikan di Gedung Merdeka jadi momentum dimimitianana periode anyar PWI Jabar 2026–2031, kalayan harepan organisasi bisa leuwih solid, komunikatif jeung terus hadir dina nyalurkeun informasi sarta ngawal kapentingan masarakat Jawa Barat.***