Tilu Poé di Jambu Sewu, Pramuka Sukatani Ngawangun Karakter jeung Prestasi

Tilu Poé di Jambu Sewu, Pramuka Sukatani Ngawangun Karakter jeung Prestasi

"Jambore Ranting jeung LT II Sukatani 2026 Dimimitian, Pamilon Ngiluan Rupa-rupa Kagiatan"

SUKATANI, PURWAKARTA — Warta Sunda Online,-

Kwartir Ranting Gerakan Pramuka Sukatani ngayakeun Perkemahan Terpadu Jambore Ranting jeung Lomba Tingkat (LT) II Taun 2026 di Bumi Perkemahan Jambu Sewu. Kagiatan anu lumangsung salila tilu poé, ti Salasa (25/8/2026) nepi ka Kemis (27/8/2026) ieu, dieusi ku rupa-rupa kagiatan anu ngandung ajén atikan, kaparigelan, kompetisi, jeung pembentukan karakter.

Kagiatan mawa téma “Tinggalkan Jejak di Bumi dengan Prestasi dan Semangat Bermanfaat Pada Sesama dengan Satya Darma Pramuka”, kalayan motto “Satyaku Ku Darmakan, Darmaku Ku Baktikan.”

Jambore jeung LT II ieu diiluan ku kurang leuwih 1.000 pamilon, anu asalna ti 35 SD/MI, 12 SMP/MTs, jeung 9 SMA/SMK/MA. Kagiatan ogé dirojong ku 36 urang panitia.

Runtuyan kagiatan dimimitian ku registrasi ulang jeung ngadegkeun tenda dina tabuh 07.00–09.30 WIB. Sanggeus éta, pamilon ngiluan upacara bubuka sarta anjangsana.a

Saterusna, pamilon mimiti ngiluan rupa-rupa kagiatan luyu jeung tingkatna. Pamilon SD/MI di antarana ngiluan lomba masak jeung ngahias tenda. Sedengkeun pamilon SMP/MTs ngiluan sababaraha cabang LT II, saperti semaphore, sandi, morse, jeung LKBBT.

Soréna, kagiatan diteruskeun ku karnaval. Sanggeus ISOMA, pamilon ngiluan pentas seni, sedengkeun para pembina dijadwalkeun ngiluan kagiatan Maulid di masjid.

Dina Rebo (26/8/2026), kagiatan dimimitian ku olahraga isuk jeung sarapan. Pamilon tuluy ngalaksanakeun penjelajahan sarta rupa-rupa lomba jeung kagiatan rotasi, di antarana pionering, lumpat estafet, TIK, balap karung, adzan, MHQ, maca sajak, jeung ngagambar.

Peutingna, suasana perkemahan beuki hirup ku kagiatan unggun anu diteruskeun ku pentas seni. Rupa-rupa pintonan jadi sarana pikeun ngamekarkeun kreativitas jeung kawani pamilon dina némbongkeun kamampuhna.

Dina poé panungtung, Kemis (27/8/2026), kagiatan dimimitian deui ku olahraga isuk jeung sarapan. Pamilon saterusna ngalaksanakeun Operasi Semut, minangka salah sahiji bentuk pembiasaan pikeun ngajaga kabersihan jeung miara lingkungan di sabudeureun tempat perkemahan.

Puncak kagiatan nyaéta Upacara Panutupan Jambore Ranting jeung LT II Kwartir Ranting Sukatani Taun 2026 anu dijadwalkeun lumangsung tabuh 08.00–11.00 WIB. Dina éta upacara ogé dilaksanakeun pengumuman juara jeung pangajén pikeun pamilon anu ngahontal préstasi.

Upacara panutupan dipingpin ku Umar, S.Pd. salaku Pembina Upacara. Runtuyan upacara ngawengku panghormatan ka pembina, laporan pamingpin upacara, pengibaran Bendera Merah Putih dibarengan ku lagu Indonesia Raya, ngaregepkeun cipta, pengucapan Pancasila, Pembukaan UUD 1945 jeung Dasa Darma Pramuka, amanat pembina, penyematan pangajén, Hymne Satya Darma Pramuka, maca doa, nepi ka laporan ahir jeung panghormatan ka pembina upacara.

Anu matak jadi perhatian dina Jambore Ranting jeung LT II Sukatani taun ieu nyaéta ilubiungna Saka Bhayangkara. Saka Bhayangkara anu dipupuhuan ku Iptu Ardianto éta disebut kakara dibentuk di tingkat Kecamatan Sukatani, sarta ayeuna geus milu ngarojong jeung ngalengkepan runtuyan kagiatan perkemahan.

Perkemahan terpadu ieu lain ngan saukur jadi ajang kompetisi, tapi ogé jadi wadah pikeun ngawangun karakter anggota Pramuka. Rupa-rupa kagiatan anu dilaksanakeun dipiharep bisa ngaronjatkeun kamandirian, disiplin, kaparigelan, kreativitas, gawé bareng, rasa paduli kana lingkungan, jeung sumanget duduluran.

Ku pangalaman salila tilu poé di Bumi Perkemahan Jambu Sewu, Jambore Ranting jeung LT II Sukatani 2026 dipiharep bisa ngahasilkeun generasi Pramuka anu aktip, tangguh, kreatif, disiplin, sarta miboga sumanget pikeun terus méré mangpaat ka sasama.***

Salam Pramuka!