Henteu Saukur Narima Bantuan, KPM PKH Ogé Bisa Ngahasilkeun Karya! 13 Désa Adu Kréativitas Ngahias Nasi Liwet

Henteu Saukur Narima Bantuan, KPM PKH Ogé Bisa Ngahasilkeun Karya! 13 Désa Adu Kréativitas Ngahias Nasi Liwet

Purwakarta – Warta Sunda Online,- 

Suasana ngareuah-reuah HUT Kamerdikaan Républik Indonésia ka-81 di Kecamatan Tegalwaru beuki rame. Keluarga Penerima Manfaat (KPM) Program Keluarga Harapan (PKH) jeung penerima bantuan sosial sembako ti 13 désa sa-Kecamatan Tegalwaru milu ngaraketkeun silaturahmi dina kagiatan Lomba Ngahias Nasi Liwet jeung Botram Antar-KPM PKH jeung Sembako, Senén (10/8/2026).

Kagiatan anu masih kénéh dina raraga Peringatan Hari Besar Nasional (PHBN) Kecamatan Tegalwaru Taun 2026 ieu henteu ngan ukur jadi ajang pasanggiri, tapi ogé jadi sarana pikeun ngaraketkeun rasa kabersamaan, gotong royong, jeung silaturahmi antarpamilon ti unggal désa.

Ti mimiti kagiatan, suasana geus karasa meriah. Unggal kelompok ngolah jeung ngahias nasi liwet kalayan rupa-rupa kréativitas. Yel-yel jeung sora suporter ti masing-masing désa ogé silih susul, ngajadikeun suasana lomba beuki hirup.

Sanggeus lomba réngsé, hasil karya unggal kelompok tuluy disiapkeun pikeun didahar babarengan. Tumpeng jeung nasi liwet anu saméméhna dipintonkeun dina lomba tuluy dijadikeun botram, pikeun dinikmati ku para pamilon.

Dina tradisi Sunda, botram lain saukur kagiatan dahar babarengan. Botram miboga ajén sosial anu raket jeung silaturahmi, gotong royong, kabersamaan, jeung budaya silih bagi.

Lomba Nasi Liwet, Ngahijikeun KPM ti 13 Désa

Ketua Panitia PHBN Kecamatan Tegalwaru Taun 2026, Unang Ali Rusyana, S.E., nétélakeun yén kagiatan ieu masih bagian tina runtuyan acara ngareuah-reuah HUT RI.

“Kagiatan ieu masih dina raraga ngareuah-reuah 17 Agustusan, luyu jeung runtuyan acara PHBN Kecamatan Tegalwaru. Poé ieu, 10 Agustus 2026, urang ngayakeun Lomba Ngahias Nasi Liwet,” saur Unang.

Nanging, ceuk anjeunna, aya hal anu ngabédakeun dina kagiatan ayeuna, nyaéta pamilonna husus ti KPM PKH jeung penerima bantuan sosial sembako ti unggal désa di Kecamatan Tegalwaru.

Lain halna ceuk Akhmad Sudarna, S.Pd.I, S.Pd, M.M, (Wakil Ketua Panitia) agiatan ieu dipiharep bisa jadi rohangan pikeun para KPM sangkan henteu ngan ukur meunangkeun manfaat tina program bantuan sosial, tapi ogé bisa ngawangun rasa percaya diri, kreativitas, jeung kabersamaan di lingkungan masarakat.

Camat: KPM PKH Ogé Boga Hak pikeun Ngareuah-reuah Agustusan

Dina kasempetan éta, Camat Tegalwaru, Endang Saepudin, SKM., KP, nyampeurkeun apresiasi kana antusiasme para KPM anu milu dina kagiatan. 

Numutkeun anjeunna, dina suasana mapag HUT RI, sakumna lapisan masarakat miboga hak anu sarua pikeun milu ngareuah-reuah kamerdikaan, kaasup para KPM PKH jeung penerima bantuan sosial.

“DI Indonésia mah anu namina KPM PKH téh kudu dibagéakeun ku ngeusian kagiatan mapag Agustusan, salah sahijina ku Lomba jeung Botram Liwet Antar-KPM PKH jeung Sembako ti masing-masing désa di Kecamatan Tegalwaru,” saur Endang.

Anjeunna miharep kagiatan sapertos kieu bisa terus dimekarkeun, henteu ngan ukur dina wangun lomba, tapi ogé jadi sarana pikeun ngawangun solidaritas jeung kabersamaan masarakat.

Botram Jadi Momen Paling Ditunggu

Sanggeus riweuh dina lomba jeung silih dukung ku yel-yel, momen anu paling ditunggu ku para pamilon nyaéta nalika sakabéh hasil olahan nasi liwet dibuka pikeun botram babarengan.

Dina éta momen, wates antara pamilon jeung suporter siga leungit. Sadayana ngahiji dina hiji méja, silih tawarkeun kadaharan, ngobrol, seuri, sarta ngarasakeun hasil karya anu geus disiapkeun babarengan.

Pa Upes, Bidang KPKH, ogé jadi bagian dina kagiatan anu ngaraketkeun para KPM ti 13 désa éta.

Kagiatan Lomba jeung Botram Liwet Antar-KPM PKH jeung Sembako ieu ahirna henteu ngan saukur ngahasilkeun juara, tapi leuwih penting deui nyaéta ngahasilkeun kabersamaan, silaturahmi, jeung rasa syukur dina mapag HUT Kamerdikaan RI ka-81.

Botram liwet janten simbol yén kamerdikaan lain ngan ukur pikeun dirayakeun, tapi ogé pikeun dirasakeun babarengan ku sakumna lapisan masarakat.***