7 Désa di Purwakarta, Désa Pamoyanan Neundeun Batu Cikal Peluncuran KDMP
7 Désa di Purwakarta, Désa Pamoyanan Neundeun Batu Cikal Peluncuran KDMP
PURWAKARTA - WSO,-
Kepala Désa Pamoyanan, H. Supriatna, ngedalkeun rasa bungahna nalika désana kapilih janten percontohan Koperasi Désa Merah Putih (KDMP) sa-Indonesia tahap kahiji. Anjeunna nyarios, peluncuran program éta téh janten kasempetan hadé pikeun nguatkeun ékonomi désa, sabab Kementerian Koperasi jeung UKM babarengan jeung sababaraha kementerian séjén geus nyiapkeun rupa-rupa aturan pangrojong, kaasup Peraturan Menteri Keuangan, juklak, juknis, jeung surat edaran, sangkan program éta bisa asup kana tahap operasional dina bulan Oktober ieu.
Dina kasempetan éta ogé, Dandim 0619/Purwakarta Letkol Inf Ardha Cairova Pariputra hadir dina kagiatan Ground Breaking Koperasi Désa Merah Putih (Zoom) anu dilaksanakeun Jumaah, 17 Oktober 2025 di Désa Pamoyanan, Kacamatan Plered, Kabupatén Purwakarta.
Kagiatan éta dilaksanakeun ku gawé bareng Koramil Plered, ngalangkungan Zoom Meeting sareng Menteri Koperasi jeung UKM RI (Menkop) Ferry Juliantono ti Désa Pamoyanan, sarta dihadiran ku Kapolres Purwakarta AKBP I Dewa Putu Gede Anom Danujaya, Kadis Indag Hariman, Kadis DPMD Rustaman Arifin, Kadiskanak Helmi, Asmat Purwakarta Heri Anwar, anu ogé minangka Camat Plered, sarta Kepala Désa Pamoyanan H. Supriatna babarengan jeung Ketua Koperasi Désa Merah Putih Désa Pamoyanan, Harun Abdul Hadad. Dina éta acara ogé dilakukeun peletakan batu munggaran minangka tanda dimulaina Koperasi Désa Merah Putih (KDMP) di lapangan.
Poto bareng : Dandim 0619/Purwakarta Letkol Inf Ardha Cairova Pariputra, Kapolres Purwakarta AKBP I Dewa Putu Gede Anom Danujaya, Kadis Indag Hariman, Kadis DPMD Rustaman Arifin, Kadiskanak Helmi, Asmat Purwakarta Heri Anwar, anu ogé minangka Camat Plered, sarta Kepala Désa Pamoyanan H. Supriatna babarengan jeung Ketua Koperasi Désa Merah Putih Désa Pamoyanan, Harun Abdul Hadad.*
Ngaliwatan arahan Zoom Menkop Ferry Juliantono, Dandim 0619/Purwakarta Letkol Inf Ardha Cairova Pariputra ngajelaskeun yén peletakan batu munggaran ieu minangka tanda dimulaina tahap operasional pembentukan KDMP, anu mangrupakeun tindak lanjut tina Instruksi Présidén Nomor 9 Taun 2025 ngeunaan percepatan pembentukan Koperasi Désa jeung Kalurahan Merah Putih.
Sedengkeun Camat Plered Heri Anwar, ngalangkungan teleponna, ngedalkeun kabagjaanana lantaran Désa Pamoyanan kapilih janten Désa percontohan KDMP sa-Indonesia tahap kahiji.
Samentara éta, Kepala Désa Pamoyanan H. Supriatna nalika diwawancara ku Warta Sunda Online (WSO) nyarios yén désana jadi salah sahiji tina tujuh désa di Purwakarta anu kapilih pikeun program KDMP. Anjeunna ngarasa reueus sareng bungah dipercanten ku Dandim 0619/Purwakarta Letkol Inf Ardha Cairova Pariputra ngaliwatan Koramil Plered, pikeun ngembangkeun Koperasi Désa Merah Putih di Désa Pamoyanan.***
0 Response to "7 Désa di Purwakarta, Désa Pamoyanan Neundeun Batu Cikal Peluncuran KDMP"
Posting Komentar