Kapala Désa Cibodas: Minimal Warga Kudu Lulus SMA, Angka Putus Sakola Kudu Diteken

Kapala Désa Cibodas: Minimal Warga Kudu Lulus SMA, Angka Putus Sakola Kudu Diteken

PURWAKARTA – Grup Majalah Warta Sunda,-

Kapala Désa Cibodas, Kecamatan Sukatani, Cep Supriatna, ngadesek sangkan teu aya deui barudak di wilayahna anu eureun sakola saméméh lulus SMA. Anjeunna nenegeskeun yén pamaréntah désa baris terus ngadukung warga, komo ayeuna geus disayagikeun program SMA Terbuka pikeun ngabantu barudak anu miboga halangan dina pendidikan.

Keterangan Poto : ti kénca Isri Damayanti (Kasi Pelayanan), Ina Sukma Rinika (Kasi Tapem) , Cep Supriatna (Kadés Cibodas), Ujang Sopandi (Dusun I), Siti Fatimah (Kasi Perencanaan) sarta Neti Nuraidah (TU Umum).*

Dumasar data anu dicatet ku Kasi Tapem Désa Cibodas, Ina Sukma Rinika, angka putus sakola di bulan Juli 2025 masih kénéh karék kacatet:

- Ti lulusan SD ka SMP, aya 10 urang anu henteu neruskeun.
- Ti lulusan SMP ka SMA/SMK/MA, aya 7 urang deui anu teu neruskeun.

“Barudak kudu meunang kasempetan sarua dina ngudag atikan. Minimal sakabéh warga kudu lulus SMA. Urang bakal usaha maksimal ngaliwatan program-program pamaréntah jeung dorongan ti masarakat supaya angka putus sakola bisa diteken,” saur Cep Supriatna nalika diwawancara.

Lian ti éta, pihak désa ogé bakal ngajalin gawé bareng sareng sakola-sakola anu aya di Sukatani pikeun ngajaga komunikasi sareng kulawarga anu barudakna rawan putus sakola. SMA Terbuka dipiharep jadi solusi pikeun warga anu teu bisa nuturkeun sakola formal alatan faktor ékonomi atawa jarak.

“Pendidikan téh pondasi pikeun masa depan. Ulah aya deui budak anu eureun di tengah jalan. Urang kudu babarengan ngajaga kasempetan atikan pikeun generasi Cibodas nu bakal datang,” tutupna.***

REDAKTUR : Tim Redaksi

Sudah saatnya bangkit dari keterpurukan...

Subscribe to receive free email updates: