Gubernur Jabar Dedi Mulyadi Unggah Perkembangan Renovasi Jembatan Dayeuhkolot
Gubernur Jabar Dedi Mulyadi Unggah Perkembangan Renovasi Jembatan Dayeuhkolot
Bandung – Grup Majalah Warta Sunda,-
Gubernur Jawa Barat, Dedi Mulyadi, ngaliwatan akun Instagram pribadina (7/9), ngunggah perkembangan renovasi Jembatan Dayeuhkolot atawa nu leuwih dipikawanoh minangka Jembatan Citarum Anyar.
Dumasar pantauan langsung di lokasi, Senén (8/9/2025), kagiatan perbaikan anu dimimitian ti bulan Juli 2025 ieu difokuskeun kana struktur utama, pelebaran awak jembatan, sarta peremajaan trotoar. Tiang-tiang jembatan anu dicét bodas ayeuna masihan kesan leuwih séger, sedengkeun bahu jalan nu tadina loba lebu ayeuna leuwih rapih jeung merenah dipaké ku nu leumpang.
Antusias warga kacida karasana. Loba pangendara nu ayeuna leuwih milih ngalangkung di jalur vital panghubung Kabupaten Bandung jeung Kota Bandung ieu. Suasana sakuriling jembatan ogé karasa béda, warga nepi ka pangendara ngarasa leuwih lega sanggeus mangtaun-taun kudu sabar ngaliwatan jembatan nu rusak.
Saméméhna, jembatan di luhur Sungai Citarum ieu mindeng dikeluhan kusabab permukaanna bolong jeung pondasina mimiti rapuh. Kaayaan éta nyieun loba pamaké jalan ngarasa waswas, utamana nu ngagunakeun treuk gedé nu muatanana beurat.
Sanusi (55), supir angkutan barang ti Majalaya, ngaku pisan ngarasa robahna.
"Mun baheula mah kudu ati-ati pisan, jalanna henteu rata jeung gampang ngabalukarkeun muatan oleng. Ayeuna mah leuwih mulus, lalampahan leuwih singget, biaya bensin ogé bisa diirit," pokna. Anjeunna ogé nambahan yén perbaikan pondasi masihan rasa aman tambahan nalika ngangkut barang ka arah Jakarta.
Samentara éta, Dedi Rukanda (52), warga Dayeuhkolot, ngajelaskeun yén renovasi henteu ngan saukur ngalancarkeun arus lalu lintas, tapi ogé ngarobah raray lingkungan sabudeureunana.
"Baheula lamun aya dua treuk papacangan, pasti macét panjang. Ayeuna mah leuwih lega. Ditambah cat anyar ngajadikeun jembatan katingali beresih, teu kumuh deui," ceuk Dedi Rukanda.
Sedengkeun Nurdin (28), pangojek online, ogé ngarasa manpaatna. "Baheula mun aya order ka Dayeuhkolot, sok mikir dua kali. Jalanna rusak, sok macét, motor ogé gancang ruksak. Ayeuna mah jalanna mulus, leuwih merenah jeung aman pikeun mawa panumpang," saur Nurdin.
Renovasi ieu mangrupakeun bagian tina rencana jangka panjang Pemprov Jabar pikeun ngabenerkeun dua jembatan di wewengkon Dayeuhkolot. Mimiti, rencanana difokuskeun ka jembatan bailey di sisi kénca, tapi Pemprov leuwih milih ngabenerkeun heula jembatan katuhu nu leuwih loba dilintasan ku pangendara.
Sanajan prosés finishingna masih kénéh lumangsung, tapi jembatan geus dibuka keur umum. Infrastuktur anyar ieu jadi harepan anyar pikeun warga Bandung jeung sakurilingna, hususna dina ngalancarkeun mobilitas sapopoé sarta ngarojong roda perekonomian.***
0 Response to "Gubernur Jabar Dedi Mulyadi Unggah Perkembangan Renovasi Jembatan Dayeuhkolot"
Posting Komentar