Agus Komarudin, S.Pd. Kapala SDN 2 Gununghéjo, Leupas Tugas Kalawan Haru jeung Syukur
Agus Komarudin, S.Pd. Kapala SDN 2 Gununghéjo, Leupas Tugas Kalawan Haru jeung Syukur
Darangdan – Grup Majalah Warta Sunda,- Taun 2025 janten momen penting pikeun Agus Komarudin, S.Pd., Kapala Sakola Dasar Negeri 2 Gununghéjo, Kecamatan Darangdan. Dina bulan Agustus ieu, anjeunna resmi lebet kana masa purnabakti (pensiun) sanggeus puluhan taun ngawula di dunya atikan.
Agus ngedalkeun rasa sukur anu jero kana lalampahan panjangna salaku guru jeung kapala sakola. “Pensiun téh sanés ahir, tapi awal anyar dina kahirupan. Abdi ngarasa kacida syukurna kana sagala nu parantos kahontal bareng kulawarga gedé SDN 2 Gununghéjo. Hatur nuhun ka sadaya guru, staf, jeung murid anu parantos masihan dukungan salami ieu waktos,” saur anjeunna kalayan haru.
Kapala sakola nu dipikawanoh tegas, bijaksana, tapi tetep handap asor ieu jadi tokoh anu deukeut jeung murid sarta babari akrab jeung guru. Pisahna ti sakola karasa pisan ku balaréa, sabab dedikasi jeung pangabdianna geus mereun kamajuan sakola, boh dina widang akademik boh dina ngajunjung nilai agamis.
Lalampahan Profesi
Agus ngamimitian karirna salaku guru honorer ti taun 1990 nepi ka 2007 di SDN Sukarasa (ayeuna ngaranna SDN 1 Sukamukti, Kecamatan Maniis). Mangtaun-taun anjeunna kudu leumpang kurang leuwih 3 km unggal poe pikeun ngajar. Dina waktos éta, gajihna ukur Rp150.000 per bulan, tapi ku kasabaran jeung ikhlas, anjeunna terus satia ngajar.
Taun 2007, anjeunna diangkat janten CPNS, teras ngalakukeun tugas di sababaraha sakola. Dina 2019, anjeunna kapindah ka SDN Cijati nepi ka 2022, teras dipercaya mingpin SDN 2 Gununghéjo.
Kontribusi jeung Prestasi
Salila 3 taun kapamingpinanana di SDN 2 Gununghéjo, Agus hasil ngawangun pager sakola tina dana CSAR sarta ngarehab gedong sakola tina dana pokir hasil aspirasi dewan. Léngkah-léngkah éta jadi bukti yén anjeunna henteu ukur mikiran atikan di kelas, tapi ogé miara sarana jeung prasarana pikeun kamajuan sakola.
Kagiatan Sosial jeung Organisasi
Salain ti tugas formal, Agus ogé aktip dina widang sosial jeung organisasi. Ti taun 2016 nepi ka ayeuna, anjeunna ngajabat salaku Ketua BPD Désa Sukamukti, Kecamatan Maniis, sarta ogé janten Ketua PAC ABPEDNAS Kecamatan Maniis anu ngawengku 8 désa: Sukamukti, Cijati, Citamiang, Sinargalih, Gunung Karung, Pasir Jambu, Tegal Datar, jeung Cirama Hilir. Kapamingpinanana di PAC ABPEDNAS ogé masih kénéh dipikaresep nepi ka 2029.
Saur Guru jeung Murid
Salah sahiji guru SDN 2 Gununghéjo, Ibu Siti Rahmawati, nyebutkeun yén Agus Komarudin téh sosok anu salawasna merehkeun dorongan ka sadaya guru. “Bapak Agus sok jadi panutan, henteu ukur dina pagawean, tapi ogé dina kahirupan sapopoe. Anjeunna ngajarkeun urang supaya sabar jeung ikhlas ngajar barudak,” saur anjeunna.
Sedengkeun salah saurang murid kelas 6, Rizky Maulana, ogé nyaritakeun pangalamanana. “Bapak Agus téh ramah pisan, sok nyarita ka barudak bari seuri. Urang sadayana sedih pisan ku anjeunna bakal pensiun,” ceuk Rizky bari nahan haru. ***
0 Response to "Agus Komarudin, S.Pd. Kapala SDN 2 Gununghéjo, Leupas Tugas Kalawan Haru jeung Syukur"
Posting Komentar