G U N G C L O
1. G U N G C L O
B
|
iasana éta babasan “Gung Clo“ sesebutan
babakuna pikeun nu resep lalajo kana
kasenian anu waditrana maké
Goong. Tumerapna éta
sesebutan gung clo téh diantarana napel ka
kuring, pedah lamun pareng aya nu tatanggapan mangrupa kasenian
utamana Seni Sunda, babakuna lamun
diparengkeun aya helaran
Wayang Golek, sabab saméméh goong ditabeuh téh kuring mah geus nyampak aya di luhur
panggung gigireun tukang goong. Anu jadi alesan pangna kuring diuk deukeut tukang goong, taya
lian nyaéta sangkan bisa ngaregepkeun kumaha ketakna Dalang ti kadeukeutan waktu
medar lalakon jeung keur ngigelkeun wayang. Aya deui alesan séjén nyaéta waktu palebah
nu boga hajat méré opieun ka panayagan kuring sok rajeun kaagehan, komo lamun
pareng tukang goongna anu bageur mah tur
aya paleuleuwih lebah ngabagikeun opieun, éta paleuleuwih téh sok dibikeun ka
kuring, tampolana sok mindeng kuring dibéré hancengan disaruakeun jeung
panayagan nu séjén.
Pikeun nu boga hajat nu beunghar tur
bageur mah tara ieuh ngitung sabaraha
lobana panayagan anu aya dipanggung, sakumaha paménta nu aya di luhur panggung, satungtung
masih kénéh ménta tambah opieun atawa dahareun teu weleh diladenan waé.
Sangkan tempat teu kapiheulaan ku batur, biasana bada sholat Isya téh
kuring mah geus nangtung di juru panggung lebah tukang goong bari culang
cileung nunggu kasempetan pikeun naék kana luhur panggung. Ku naon maké culang
cileung kawas anu boga dosa?. Kuring mah culang cileung téh sabab sieun kaperego
ku kaamanan nu ngajaga panggung, ari geus karuhan panayagan naraék ka panggung
mah sarta dianggap aman, sanajan bari rada seber bisi katohian ku Hansip, kalacat
waé kuring téh naék ka panggung.
Pikeun di kampung kuring mah saban aya anu helaran wayang golek, aya aturan
ti nu boga hajat saméméh rombongan wayang golek hanjat ka panggung, salian ti
Dalang, Juru Kawih jeung Panayagan teu meunang aya nu naék ka luhur panggung,
maksudna supaya teu ngaheurinan ka panayagan.***
Cag.
