Prosa Mini (Godi Suwarna) : I M I S S Y O U

Godi Suwarna

7 Juli pukul 22.43 · 

Prosa Mini
👽 I M I S S Y O U
~~~~~~~~~~~~~~~☠️

🥀
Keur uleng wé mencrong TV. Lalajo warta kapal udara nu murag peuting kamari. Jelema nu pabaliut. Ruruntuk kapal nu ngabebela. Ambulan parulang-anting. Keur kitu, HP disada. Tanda aya SMS nu asup. Nomerna anèh. Dibaca.

🥀
“Halo, aku Jasmine! Masih ingatkah? I Miss You!” cénah. Gusti. Jasmine? Mojang Bérlin nu moal kapopohokeun. Geulisna. Soméahna. Gasik ngetik walonan. “Tentu saja saya ingat. Lagi apa di manakah? I Miss You!” Walonan dikirimkeun.

🥀
Haté ujug-ujug aléwoh. Warna-warni panineungan kumalangkang. Bruh-brèh sagala rupana. Teu lila, HP disada deui. Walonan ti Jasmine. “Aku otw ke rumahmu. I Miss You!” Hah? Nyaan kitu? Aya bagja. Aya geumpeur. Pagaliwota.

🥀
Tungtungna ngajémprak di tepas. Ngahuhuleng. Umat-imut. Jasmine. Kungsi deukeut. Kungsi geugeut. Di hiji dayeuh nu keur sumedeng midang. Musim panas. Tilu taun ka tukang. Kari-kari rék nepungan. Duh.

🥀
Lamunan kapegat ku sora HP. SMS ti Jasmine: “Begini, kapalku meledak. Aku terbakar. Hangus. Tapi aku ingin sekali ketemu kamu. Tralaaa, aku dataaang! I Miss You!”

🥀
Jam buhun disada dualas kali. Angin ujug-ujug ngahiuk. Hordéng endag-endagan. Bau beuleum daging tutung. Nyelengseng. Nu keketrok kana jandéla. Lir nu gegedor kana jajantung. Gustiii…

~~~🥀👽🥀~~~

REDAKTUR : Tim Redaksi

Sudah saatnya bangkit dari keterpurukan...

Subscribe to receive free email updates: