Warta Pustaka Sunda - NGADULAG
NGADULAG
Potrét: Sofyan
|
A
|
ri bulan puasa téh sok resep nénjo
bedug. Atuda kiwari mah sora bedug geus kagéséh ku TOA. Sanajan aya kénéh nu
maké éta ogé ngan teu loba kawas jaman baréto. Di masjid komplék kuring ogé
kungsi aya bedug ngan ti saprak kulitna soék tuluy ngiles. Cénah dioméan tapi
nepi ka kiwari teu datang deui. Di musola kantor ogé kungsi aya bedug leuti,k
kawasna kulitna tina kulit embé. Bangun nu seseg. Kiwari geus teu katénjo deui
juntrungna. Teuing ti jaman iraha ayana bedug di Nusantara téh.
Tah, kotrétan mini ieu mah lain rék ngabahas sajarah
bedug di urang. Luyu jeung suasana wé jeung kasono kana sora bedug anu raket
dina bulan puasa. Baréto mah bulan puasa asa teu ramé lamun teu ngadulag téh.
Rérés salat tarawéh atawa ngahudangkeun saur apan sora bedug ngadurugdug
patémbalan di unggal kampung. Barudak kiwari mah ngahudangkeun saur téh ku
tatabeuhan modéren. Aya ogé ku alat-alat basajan, nu penting ramé.
Bedug jeung ngadulag jadi inspirasi pikeun pangarang, contona “Bedug Ti
Nagri Ajrak” yasana Ahmad Bakri. Da asa teu bosen maca carpon klasik modél kitu
téh. Komo dina suasana bulan puasa ayeuna. Émosi nu maca dibawa milu kana alur
carpon. Meureun témana mah protés atawa pemberontakan kaom ngora ka kaom kolot
bab nakol bedug. Kalakuan barudak pamuda ku matak pikakeuheuleun jeung
pikaseurieun. Tokoh kuring nu jadi ulon-ulonna horéng talukna téh ku bapana anu
lain tokoh sambarangan di lemburna. Atuh nu maca ogé milu karunya ka tokoh Pa
Lebé anu pulang anting ka pasir rék nyacag bedug nyiliwuri pédah ngaguruh lain
mangsa.
Ah, bedug jeung ngadulag dina bulan puasa ku matak resep. Jaman kiwari ogé
geuning aya rampak bedug di dayeuh. Sabalikna, kiwari di pilemburan geus langka
sora bedug komo ngadulag mah. ***
Jatinangor, 14/05/2019
0 Response to "Warta Pustaka Sunda - NGADULAG"
Posting Komentar